Қазақстан Республикасынан тыс жерлерге тұрақты тұруға кетуге байланысты БЖЗҚ-дан зейнетақы төлемдерін алуға:
1) «Қазақстан Республикасында зейнетақымен қамсыздандыру туралы» Қазақстан Республикасы Заңының 31 және 32-баптарының ережелеріне сәйкес міндетті зейнетақы жарналары (бұдан әрі - МЗЖ) және міндетті кәсіптік зейнетақы жарналары (бұдан әрі - МКЗЖ) есебінен БЖЗҚ-да зейнетақы жинақтары бар және Қазақстан Республикасының заңнамасында айқындалған, кету фактiсiн растайтын құжаттарды ұсынған Қазақстан Республикасынан тыс жерлерге тұрақты тұруға кеткен шетелдiктер мен азаматтығы жоқ адамдардың;
2) Заңның 33-бабының ережелеріне сәйкес ерікті зейнетақы жарналары (бұдан әрі - ЕЗЖ) есебінен БЖЗҚ-да зейнетақы жинақтары бар және Қазақстан Республикасының заңнамасында айқындалған, кету ниетiн немесе фактiсiн растайтын құжаттарды ұсынған Қазақстан Республикасынан тыс жерлерге тұрақты тұруға кететiн немесе кеткен шетелдіктер мен азаматтығы жоқ адамдардың құқығы бар.
МЗЖ және МКЗЖ есебінен зейнетақы төлемдерін жүзеге асыру тәртібі Заңның 34-бабының 9-тармағының 2) тармақшасына сәйкес Қазақстан Республикасы Үкіметімен белгіленеді. Көрсетілген тәртіп, сонымен қатар қажетті құжаттар тізбесі Қазақстан Республикасы Үкіметінің 2013 жылғы 2 қазандағы № 1042 Қаулысымен бекітілген Бірыңғай жинақтаушы зейнетақы қорынан төленетін міндетті зейнетақы жарналары, міндетті кәсіптік зейнетақы жарналары есебінен қалыптасқан зейнетақы жинақтарынан зейнетақы төлемдерін жүзеге асыру қағидасында белгіленген (бұдан әрі - № 1042 қағида).
Заңның 27-бабының 4-тармағына сәйкес ЕЗЖ есебінен зейнетақы төлемдерін жүзеге асыру тәртібі ЕЗЖ есебінен шарт тараптарының келісімі бойынша айқындалады. Бұл ретте, ЕЗЖ есебінен зейнетақы төлемдерін жүзеге асыру үшін қажетті құжаттардың тізбесі «БЖЗҚ» АҚ Басқармасының 26.06.2017 жылғы № 28 хаттамасымен бекітілген «БЖЗҚ» АҚ Зейнетақы қағидаларында (ерікті зейнетақы жарналарын есепке алу бойынша) (бұдан әрі – Зейнетақы қағидасы) айқындалған (www.enpf.kz мекенжайы бойынша БЖЗҚ корпоративтік веб-сайтында орналастырылған).
Зейнетақы жинақтарының төлеміне құжаттар БЖЗҚ-ға келесі тәсілдердің бірімен:
- жеке өзі жүгінген кезде;
- пошталық байланыс арқылы;
- үшінші тұлға (сенім білдірілген адам) арқылы беріледі. Бұл ретте құжаттар сенім білдірілген адам БЖЗҚ кеңсесіне өзі өтініш берген кезде ғана қабылданады.
№ 1042 қағиданың 8-тармағына және Зейнетақы қағидасының 29-тармағына сәйкес Қазақстан Республикасынан тыс жерлерге тұрақты тұруға кеткен зейнетақы жинақтары бар шетелдіктер мен азаматтығы жоқ адамдар өздері өтініш жасаған кезде міндетті түрде БЖЗҚ-ға:
1) БЖЗҚ-ның ішкі құжатымен бекітілген нысан бойынша зейнетақы төлемдерін тағайындау туралы өтініш (бұдан әрі – өтініш);
2) егер Қазақстан Республикасы ратификациялаған халықаралық шарттарда өзгеше көзделмесе, шетелдік паспорттың көшірмесін және салыстырып тексеру үшін түпнұсқасын;
3) алушының банк шоты туралы мәліметтерді ұсынады.
Мұнымен бірге, № 1042 Қағиданың 8-тармағына сай БЖЗҚ жоғарыда көрсетілген құжаттарды алған кезде БЖЗҚ Қазақстан Республикасының мемлекеттік органдарының ақпараттық жүйелерінен өтініш білдірген шетелдікте немесе азаматтығы жоқ тұлғада Қазақстан Республикасы азаматының жеке куәлігінің не болмаса Қазақстан Республикасында шетелдіктің тұруға ықтиярхатының немесе Қазақстан Республикасының уәкілетті органы берген азаматтығы жоқ тұлғаның куәлігінің бар-жоғы және оның жарамдылығы туралы мәліметтерді сұратады.
Өтініш жасаған шетелдіктің немесе азаматтығы жоқ адамның Қазақстан Республикасынан тыс жерлерге тұрақты тұруға кетуіне байланысты Қазақстан Республикасының уәкілетті органы берген Қазақстан Республикасы азаматының жеке куәлігінің не шетелдіктің Қазақстан Республикасында тұруға ықтиярхатының не азаматтығы жоқ адамның куәлігінің жарамсыздығы туралы мәліметтер алынған жағдайда, БЖЗҚ осы № 1042 қағиданың 19-тармағында белгіленген мерзімдерде зейнетақы төлемін жүзеге асырады.
Қазақстан Республикасының уәкілетті органы берген Қазақстан Республикасы азаматының жеке куәлігінің не шетелдіктің Қазақстан Республикасында тұруға ықтиярхатының не азаматтығы жоқ адамның Қазақстан Республикасының уәкілетті органы берген куәлігінің бар екендігі және оның жарамдылығы туралы мәліметтер алынған, сондай-ақ өтініш жасаған шетелдіктің немесе азаматтығы жоқ адамның Қазақстан Республикасынан тыс жерлерге тұрақты тұруға кеткені туралы мәліметтер болмаған жағдайда, БЖЗҚ өтінішті № 1042 қағиданың 18-тармағында белгіленген мерзімдерде оны қабылдаудан не орындаудан бас тартады.
Қазақстан Республикасынан тыс жерлерге тұрақты тұруға кететін, ЕЗЖ есебінен зейнетақы төлемдерін алушылар болып табылатын шетелдіктер мен азаматтығы жоқ адамдар БЖЗҚ –ға өздері келіп өтініш жасаған кезде:
1) өтініш;
2) шетелдік төлқұжаттың не азаматтығы жоқ тұлға куәлігінің көшірмесін және салыстырып тексеру үшін тұпнұсқасын;
3) алушының банк шоты туралы мәліметтерді береді.
Өтінішті үшінші тұлға (сенім білдірілген) арқылы берген жағдайда қосымша жоғарыда көрсетілген құжаттарға үшінші тұлға:
1) нотариат куәландырған сенімхаттың түпнұсқасын немесе оның нотариат куәландырған көшірмесін;
2) үшінші тұлғаның жеке басын куәландыратын құжаттың көшірмесін және салыстырып тексеру үшін түпнұсқасын береді.
Бұл ретте алушының жеке басын куәландыратын құжаттың көшірмесін нотариат куәландырады (нотариатта куәландыру тұратын мемлекетінде жүргізілген жағдайда).
Пошта байланысы құралдары арқылы өтініш берілген кезде алушының жеке басын куәландыратын құжатты, сондай-ақ өтініштегі алушының қолын нотариат куәландырады (нотариатта куәландыру тұратын мемлекетінде жүргізілген жағдайда).
Құжаттың көшірмесін түпнұсқасымен дұрыстығын куәландыру, өтініште алушының қолтаңбасының түпнұсқалығын, сенімхатты растау бөлігінде нотариаттық іс-әрекеттер шетел мемлекетінде жүргізілген жағдайда, онда Қазақстан Республикасы ратификациялаған халықаралық шарттарда өзгеше белгіленген жағдайларды қоспағанда, оларды заңдастыру қажет.
БЖЗҚ зейнетақы төлемдерін деректемелері өтініште көрсетілген алушының банктік шотына:
Қазақстан Республикасының аумағындағы екінші деңгейдегі банктерде/банктік операциялардың жекелеген түрлерін жүзеге асыратын ұйымда ашылған банк шоттарына аудару кезінде тек ұлттық валютамен;
Қазақстан Республикасының аумағынан тысқары шетелдік банктерде ашылған банк шоттарына аудару кезінде АҚШ долларымен, еуромен, фунт стерлингімен немесе ресей рублімен аударады.
Құжаттарды беру тәртібіне (жеке өзі өтініш білдірген/пошталық байланыс құралдары/үшінші тұлға арқылы), оларды ресімдеу талабына байланысты барлық қажетті құжаттардың өзекті тізбесі, сонымен қатар сенімхаттың және төлем валютасының түріне байланысты өтініш бланкілерін толтыру үлгілері www.enpf.kz мекенжайы бойынша БЖЗҚ корпоративтік веб-сайтында орналастырылған, ол жерде ақпарат үнемі жаңартылады.
Шетелдік паспортты алған кезде алушының деректемелері, нақтырақ айтқанда, тегі, аты, әкесінің аты - бар болса, өзгерген жағдайда, Құжаттар тізбесіне қосымша қосымша негізгі деректемелердің өзгергендігін растайтын, шетелдік құжаттарды рәсімдеуге қойылатын талаптар сақтала отырып реімделген төмендегі құжаттардың бірін:
1) Қазақстан Республикасының уәкілетті органының анықтамсын;
2) шетелдік мемлекеттің уәкілетті органының анықтамасын;
3) тегінің/атының/әкесінің аты өзгергендігі туралы куәлік/анықтама;
4) некені қию/бұзу туралы куәлік.
Сонымен қатар назарларыңызды мынаған аударамыз:
- 1961 жылғы 5 қазандағы Шетелдік ресми құжаттарды заңдастыру талабын жоятын Гаага конвенциясы (бұдан әрі - Конвенция) Конвенцияға қатысушы елдердің мекемелері мен ұйымдарынан шығатын ресми құжаттар заңдастырудан босатылады және алушының тұрақты тұратын елінде осы құжаттарға апостиль қоюға жатады;
«Қазақстан Республикасындағы тілдер туралы» Қазақстан Республикасының 1997 жылғы 11 шілдедегі №151-І Заңының 10-бабына сәйкес, мемлекеттік органдар жүйесінде, Қазақстан Республикасының түрлі ұйымдарында есепке алу – статистикалық, қаржылық және техникалық құжаттама жүргізу меншік түріне тәуелсіз түрде мемлекеттік және орыс тілдерінде жүргізіледі. Осыған байланысты, шет тілінде жасаған, БЖЗҚ-ға берілетін барлық құжаттар, оның ішінде құжаттың көшірмесінің дұрыстығын куәландыру кезінде жасалған нотариустардың куәландырма қолдары, алушының және (немесе) аудармашының қолы мемлекеттік не орыс тілдеріне аударылады. Егер аударма шетелдік мемлекеттің аумағында жасалған болса, онда ол да Қазақстан Республикасы ратификациялаған халықаралық шарттарда өзгеше белгіленген жағдайларды қоспағанда заңдастырылуға жатады.
