Жаңалықтар

«БЖЗҚ» АҚ зейнеткерлік жасқа толған (ерлер – 63 жас және одан жоғары, әйелдер 59 жас және одан жоғары) және Бірыңғай жинақтаушы зейнетақы қорында зейнетақы жинақтары бар азаматтарға Қордан зейнетақы төлемдерін алу қажеттілігін хабарлайды.

БЖЗҚ-дан берілетін зейнетақы төлемдері алушы өтініш берген күннен бастап тағайындалады және зейнетақы жинақтары таусылғанша жүзеге асырылады. Осыған байланысты «Азаматтарға арналған үкімет» Мемлекеттік корпорациясы» коммерциялық емес акционерлік қоғамына, оның жұмыс кестесін ескере отырып, кез келген ыңғайлы уақытта жүгіну керектігін еске саламыз. Бұл ретте өтінішті зейнеткерлік жасқа толуға 10 күн қалғанда беруге болады.

Сонымен қатар Қазақстан Республикасының зейнетақы заңнамасына мына төмендегі өзгерістердің енгізіліп, 2018 жылдың 1 қаңтарынан бастап күшіне енгендігін хабарлаймыз:

1) әйелдерге жасына байланысты зейнетақы төлемдерін тағайындау:

• 2018 жылғы 1 қаңтардан бастап - 58,5 жасқа толғанда;
• 2019 жылғы 1 қаңтардан бастап - 59 жасқа толғанда;
• 2020 жылғы 1 қаңтардан бастап - 59,5 жасқа толғанда;
• 2021 жылғы 1 қаңтардан бастап - 60 жасқа толғанда;
• 2022 жылғы 1 қаңтардан бастап - 60,5 жасқа толғанда;
• 2023 жылғы 1 қаңтардан бастап - 61 жасқа толғанда;
• 2024 жылғы 1 қаңтардан бастап - 61,5 жасқа толғанда;
• 2025 жылғы 1 қаңтардан бастап - 62 жасқа толғанда;
• 2026 жылғы 1 қаңтардан бастап - 62,5 жасқа толғанда;
• 2027 жылғы 1 қаңтардан бастап 63 жасқа толғанда жүргізіледі.

2) БЖЗҚ-дан міндетті зейнетақы жарналары және міндетті кәсіптік зейнетақы жарналарынан құралған жинақтар есебінен зейнетақы төлемдері:  

• бекітілген кесте бойынша ай сайынғы зейнетақы төлемдері түрінде;
• егер алушылар өтініш берген күні, олардың зейнетақы жинақтарының сомасы республикалық бюджет туралы заңда тиісті қаржы жылына белгіленген ең төменгі зейнетақының он екі еселенген мөлшерінен аспаған жағдайда (2019 жылы – 433 296 теңге = 12 * 36 108), бір жолғы төлем түрінде;
• «БЖЗҚ» АҚ-тан зейнетақы төлемдерін есептеу тәртібіне сәйкес Қордан ай сайынғы зейнетақы төлемдерінің мөлшері республикалық бюджет туралы заңда тиісті қаржы жылына белгіленген ең төменгі күнкөріс деңгейінің 54 пайызынан кем емес көлемде (2019 жылы – 16 036,92 тенге = 54% * 29 698) жүзеге асырылады.

БЖЗҚ салымшылар мен алушыларға SMS, электрондық пошта, пуш-хабарлама, сондай-ақ «Қазпошта» АҚ-тың пошталық хабарламасы арқылы тұрақты негізде ақпарат беру жұмыстарын жүргізіп келеді.

БЖЗҚ зейнеткерлік жасқа толған және Қорда зейнетақы жинақтары бар, бірақ күні бүгінге дейін оларды қандай да бір себептермен алмаған адамдарға «Азаматтарға арналған үкімет» Мемлекеттік корпорациясы» коммерциялық емес акционерлік қоғамының бөлімшесіне жүгіну қажеттігін тағы да ескертеді.