Кері қарай
Міндетті зейнетақы жарналарын есепке алу үшін жеке зейнетақы шотын ашу
Міндетті зейнетақы жарналары (МЗЖ) – Қазақстан Республикасының Әлеуметтік кодексіне (Кодекс) сәйкес Қазақстан Республикасының заңнамасында белгіленген тәртіппен БЖЗҚ-ға енгізілетін ақша.
МЗЖ төлеу жөніндегі агент (агент) – Қазақстан Республикасындағы қызметін шетелдік заңды тұлғалардың тұрақты мекемесі, филиалдары, өкілдіктері арқылы жүзеге асыратын шетелдік заңды тұлғаны қоса алғанда, Қазақстан Республикасының заңнамасында айқындалатын тәртіппен МЗЖ-ны есептейтін, ұстап қалатын (есепке жазатын) және БЖЗҚ-ға аударатын жеке немесе заңды тұлға. Сондай-ақ сақтандыру ұйымы агент ретінде қарастырылады.
Қызметкерлерге бірыңғай төлемді есептеу (есепке жазу), аудару жөніндегі агент ретінде Қазақстан Республикасының «Салық және бюджетке төленетін басқа да міндетті төлемдер туралы» кодексінің (Салық кодексі) 776-1-бабына сәйкес айқындалған салық агенттері қаралады.
Жұмыстарды орындау (қызметтерді көрсету) болып табылатын азаматтық-құқықтық сипаттағы шарттар бойынша кірістер алатын жеке тұлғалар үшін МЗЖ төлеу жөніндегі агент ретінде Қазақстан Республикасының салық заңнамасында айқындалған салық агенттері қаралады.
МЗЖ есепке алу үшін БЖЗҚ-да жеке зейнетақы шоты (ЖЗШ) Қазақстан Республикасының Үкіметі айқындаған тәртіппен МЗЖ немесе өсімпұлды аудару кезінде БЖЗҚ-ға агенттер ұсынатын жеке тұлғалардың тізімдері негізінде ашылады.
Қазақстан Республикасының заңнамасында көзделген, БЖЗҚ-ның функцияларын іске асыру үшін қажетті, МЗЖ салымшысының азаматтығы, мәртебесі, әрекетке қабілеттілігі, қолданыстағы жеке басты куәландыратын құжатының деректемелері, Қазақстан Республикасындағы тұрғылықты жері бойынша тіркелген орны, «электрондық үкіметтің» веб-порталында тіркелген ұялы байланыстың абоненттік құрылғысының телефон нөмірі туралы мәліметтерді және бар болса, МЗЖ салымшысы туралы өзге де мәліметтерді БЖЗҚ мемлекеттік органдардың тиісті ақпараттық жүйелерінен алады.
БЖЗҚ ЖЗШ ашумен байланысты қызметін жүзеге асыру кезінде дербес деректерді жинау және өңдеу субъектінің немесе оның заңды өкілінің келісімінсіз жүргізіледі.
МЗЖ есебінен зейнетақымен қамсыздандыру туралы шарт (қосылу шарты) (Шарт) – МЗЖ салымшысы талаптарын ұсынылған Шартқа тұтастай қосылу арқылы ғана қабылдай алатын қосылу шарты.
МЗЖ салымшысы, МЗЖ төлеу жөніндегі агент МЗЖ есепке алу үшін ашылған ЖЗШ-ға МЗЖ немесе өсімпұл есепке жазылған күннен бастап Шартқа қосылған болып есептеледі. Бұл ретте Шартқа қосылу үшін кәмелетке толмаған адамның заңды өкілінің келісімі талап етілмейді.
Агенттер БЖЗҚ-ға МЗЖ-ны Кодексте анықталатын мөлшерлемелер бойынша төлеуі тиіс.
Кодекс қолданысқа енгізілгенге дейін МЗЖ салымшысымен жасалған шарт Шартқа қайшы келмейтін бөлігінде қолданылады. Зейнетақымен қамсыздандыру туралы шарттар бойынша жинақтаушы зейнетақы қорларының зейнетақы активтері мен міндеттемелерін беру аясында зейнетақы жинақтары БЖЗҚ-ға берілген МЗЖ салымшысы БЖЗҚ-да ЖЗШ ашылған күннен бастап Шартқа қосылды деп есептеледі. Жинақтаушы зейнетақы қоры деп Қазақстан Республикасының Ұлттық Банкінің нормативтік құқықтық актісінде белгіленген тәртіппен лицензия қолданысы тоқтатылған, зейнетақы жарналарын тарту және зейнетақы төлемдері бойынша қызметті жүзеге асырған заңды тұлға деп түсіндіріледі.
