«Ұлттық қор - балаларға» бағдарламасы аясында "БЖЗҚ" АҚ жыл басынан бері 2024 жылғы 1 қазандағы жағдай бойынша жалпы сомасы шамамен 2,8 млн АҚШ доллары болатын 27 547 өтінішті орындады (өтініш берушілердің банктік шоттарына есептеу үшін уәкілетті операторларға аударылды). Оның ішінде тұрғын үй жағдайларын жақсарту мақсатында 1,5 млн жуық АҚШ долларына 15 003 өтініш, білім беру ақысын төлеу үшін 1,3 млн жуық АҚШ долларына 12 544 өтініш орындалды. Бұл ретте нысаналы жинақтарды алушы барлық соманы немесе оның бір бөлігін пайдалануға құқылы, пайдаланылмаған қалдық сома нысаналы жинақтау шотында (НЖШ) қалады.
Тұрғын үйді жақсартуға арналған қаражатты пайдаланудың ең танымал қосалқы мақсаттары: одан әрі жинақтау үшін тұрғын үй құрылысы жинақтарына салымды толықтыруға (шамамен 1,5 млн АҚШ долларына 14 512 өтініш орындалды), азаматтық-құқықтық мәмілелер бойынша меншікке тұрғын үй сатып алуға (түпкілікті есеп айырысу) – 16,6 мыңнан астам АҚШ долларына 166 өтініш, тұрғын үй сатып алуға ипотекалық тұрғын үй қарызын алу үшін бастапқы жарнаны енгізуге -13,7 мың АҚШ долларына 136 өтініш.
Білім алу ақысын төлеу шеңберіндегі ең танымал қосалқы мақсаттар: Қазақстан Республикасының аумағында орналасқан білім беру ұйымдарының білім беру қызметтеріне үлестермен (әрбір академиялық кезең немесе оқу жылы үшін) немесе толық көлемде бір мезгілде (бүкіл оқу мерзімі үшін) ақы төлеу (1 млн астам АҚШ долларына 10 171 өтініш орындалды), білім беру жинақтау салымы туралы шарт бойынша білім беру жинақтау салымын толықтыру (173,2 мыңнан астам АҚШ долларына 1 725 өтініш орындалды), шетелдік білім беру ұйымдарының білім беру қызметтеріне үлестермен (әрбір академиялық кезең немесе оқу жылы үшін) немесе толық көлемде (бүкіл оқу мерзімі үшін) бір рет біржолғы ақы төлеу (шамамен 55,7 мың АҚШ долларына 555 өтініш орындалды) жүзеге асты. Бұл деректер нысаналы жинақтарды білім алу ақысын төлеуге пайдаланудың жаздың басына қарағанда соңғы екі айда шамамен 2-3 есеге өскені байқатады. Бұл жаңа оқу жылының басталуына және жас түлектердің оқу орындарына түсуіне байланысты болуы ықтимал.
Сонымен қатар, уәкілетті операторлардан бағдарламаға қатысушылардың БЖЗҚ-дағы нысаналы жинақтау шоттарына қаражаттың қайтарылуы да орын алды. 2024 жылғы 1 қазандағы жағдай бойынша БЖЗҚ-ға тұрғын үйге берілген 1 993 өтінішке сай 198,5 мың АҚШ долларынан астам және білім алу ақысын төлеуге берілген 2 046 өтінішке сәйкес шамамен 200,4 мың АҚШ доллары қайтарылды. Қайтарулар негізінен уәкілетті операторларға 45 жұмыс күні ішінде қажетті құжаттар берілмегендіктен орын алған. Бағдарламаға қатысушылар 10 жыл ішінде нысаналы жинақтарды алуға қайтадан өтініш бере алады, бұл мерзім өткеннен кейін қаражат ерікті зейнетақы шоттарына аударылады.
Нысаналы жинақтарды тұрғын үй жағдайларын жақсарту және (немесе) білім алуға ақы төлеу мақсатында беру туралы уәкілетті операторлар мен өңірлер бөлінісіндегі толық ақпаратпен enpf.kz сайтында танысуға болады.
Естеріңізге сала кетейік, "Ұлттық қор - балаларға" бағдарламасына сәйкес Қазақстан Республикасы Ұлттық қорының инвестициялық кірісінің 50% мөлшері жылына бір рет 2006 жылы және одан кейін туған Қазақстан Республикасының азаматы болып есептелетін балалар арасында теңдей бөлінеді. 2024 жылғы ақпанда БЖЗҚ-да 2023 жылдың қорытындысы бойынша барлық балаларға алғашқы нысаналы талаптар есептеліп, 2024 жылы 18 жасқа толған азаматтардың нысаналы жинақтау шоттарына (НЖШ) нысаналы жинақтар (НЖ) есептелді және төлемдер жүзеге асырыла бастады. Бағдарламаға қатысушылардың жалпы саны - 6 919 131 бала (қоса алғанда, 01.01.2006ж. бастап 31.12.2023ж. дейін туған балалар). Оның ішінде 304 815 қатысушы 2024 жылы 18 жасқа толады немесе толды (қоса алғанда, 01.01.2006ж. бастап 31.12.2006ж. дейін туған балалар).
Бағдарламаның шарттарымен танысып, нұсқаулықтар мен өзіңізді қызықтыратын сұрақтарға жауаптарды kids.enpf.kz сайтынан немесе БЖЗҚ ЕНПФ YouTube-арнасынан алуға болады. Сондай-ақ, "Ұлттық қор – балаларға" бағдарламасын іске асыру, бала кәмелетке толғанға дейінгі және одан кейінгі іс-қимыл алгоритмі туралы бейненұсқаулық БЖЗҚ ЕНПФ YouTube-арнасында төмендегі сілтеме бойынша орналастырылғанын ескертеміз: https://www.youtube.com/watch?v=HHQNAxfskX8.
3405