«БЖЗҚ» АҚ ресми сайтына 2016 жылғы 1 қаңтардағы жағдай бойынша зейнетақы активтері есебінен құралған инвестициялық қоржын құрылымын орналастырды.
Бұл салымшылардың зейнетақы жинақтарының қандай қаржы құралдарына және қандай көлемде инвестицияланатыны туралы толық есеп.
«2016 жылғы 1 қаңтардағы жағдай бойынша БЖЗҚ зейнетақы активтері қоржынының ағымдағы құны – 5 834,6 млрд теңге. ЗА қоржынының өсімі 2015 жылдың желтоқсан айында 179,7 млрд теңгені немесе 3,2%-ды құрады.
2015 жылғы 01 қаңтар мен 2015 жылғы 31 желтоқсан аралығындағы кезең үшін БЖЗҚ ЗА қоржынының табыстылығы осы кезеңдегі 13,6% құнсыздану деңгейімен 15,65%-ды құрады», - деп мәлімдеді «БЖЗҚ» баспасөз қызметінен.
ҚР Ұлттық банкінің сенімгерлік басқаруындағы зейнетақы активтерін құрылымдық бөлу БЖЗҚ Инвестициялық декларациясының талаптарына сәйкес және 2016 жылғы 1 қаңтарда былайша ұсынылып отыр.
Қоржындағы ҚР МБҚ үлесі 2015 жылғы 1 желтоқсанда 44,99%-дан артып, 45,11%-ды құрады. ҚР МБҚ ағымдағы құны желтоқсан айында 2 632 млрд теңгеге дейін 3,4%-ға артты. Есепті кезеңде 543,0 млрд теңге сомасына ҚР ҰБ қысқа мерзімді дисконттық ноталары сатып алынды. Сонымен қатар 477,6 млрд теңге сомасында ҚРҰБ ноталары өтелді.
Қоржындағы шетелдік мемлекеттердің МБҚ үлесі бір ай бұрынғы 0,92%-дан 0,87%-ға дейін азайды. Шетелдік мемлекеттердің МБҚ ағымдағы құны ай ішінде 50,7 млрд теңгеге дейін 2,5%-ға азайды. 2015 жылдың желтоқсан айында 6,8 млрд теңге сомасына АҚШ МБҚ (US Treasury) өтелді.
«2015 жылдың желтоқсан айында ХҚҰ облигацияларының ағымдағы құны 2,2 млрд теңге сомасында Еуропалық инвестициялық банк облигацияларын өтеу нәтижесінде ай ішінде 2%-ға төмендеп, 84,9 млрд теңгені құрады.
Қоржындағы ҚР эмитенттерінің корпоративтік облигацияларының үлесі бір ай бұрынғы 38,48%-дан 37,92%-ға дейін азайды. ҚР эмитенттерінің корпоративтік облигацияларының ағымдағы құны 2 213 млрд теңгені құрады және ай ішінде 36,6 млрд теңгеге өсті. Желтоқсан айында 8,9 млрд теңге сомасында облигациялар өтелді», - делінген есепте.
Қоржындағы шетелдік эмитенттердің корпоративтік облигацияларының көлемі 165,8 млрд теңгеге дейін өсті. Бұл ретте қоржындағы үлес бағамдық және бағалық қайта бағалау есебінен 2,65%-дан 2,84%-ға дейін артты. Желтоқсан айында 431 млн теңге сомасында Caterpillar Inc облигациялары өтелді.
Есепті айда шетелдік эмитенттердің PPN (құрылымдық ноталар) ағымдағы құны 53,5 млрд теңгені құрады. Қоржындағы олардың үлесі өзгермей, 0,92%-ды құрап отыр.
Есепті айда ҚР эмитенттерінің акциялары мен депозитарлық қолхаттарының көлемі 3,4 млрд теңгеге азайып, 113,1 млрд теңгені құрады. Қоржындағы олардың үлесі 2,06%-дан 1,94%-ға дейін азайды. Есепті кезеңде қазақстандық эмитенттердің акцияларымен мәмілелер болған жоқ.
Шетелдік эмитенттердің акциялары және депозитарлық қолхаттары. Есепті айда шетелдік эмитенттердің акциялары мен депозитарлық қолхаттарының көлемі бір ай ішінде 63,6 млн теңгеге азайып, 13,6 млрд теңгені құрады. Қоржындағы олардың үлесі де 0,24%-дан 0,23%-ға дейін азайды.
ҚР екінші деңгейдегі банктеріндегі депозиттер. Есепті кезеңде ҚР ЕДБ-дегі депозиттердің көлемі 18,8 млрд теңгеге азайып, 363,9 млрд теңгені құрады. Осылайша қоржындағы депозиттер үлесі желтоқсан айында 6,77%-дан 6,24%-ға дейін төмендеді. 2015 жылдың осы айында 17,0 млрд теңге сомасында ЕДБ салымы өтелді.
7577