Жаңалықтар

«БЖЗҚ» АҚ Басқарма төрайымы Нұрбүбі Наурызбаеваның республика өңірлеріне іссапары жалғасуда. 2017 жылғы 10 тамызда ол Шығыс Қазақстан облысының кәсіпкер әйелдерімен кездесті.

Кездесуге «Атамекен» Ұлттық кәсіпкерлер палатасының облыстық іскер әйелдер Кеңесі, «Өскемен әйелдері» Қауымдастығы, «Нұр Отан» партиясының облыстық филиалы және Шығыс Қазақстан облысы бойынша «Даму» кәсіпкерлікті дамыту Қоры» АҚ өкілдері қатысты.

Өзінің алғы сөзінде облыстық іскер әйелдер Кеңесінің төрайымы Елена Березинская-Әбілова Шығыс Қазақстан облысының әйелдер қауымы облыс бойынша әрекеттегі 43 206 бизнес субъектісін (немесе облыс бойынша 45%) басқаратындығын атап өтті.

Шығыс Қазақстан облысы іскер әйелдер Кеңесінің құрамында 94 кәсіпкер әйел бар. Олардың арасында депутаттық корпустың өкілдері, өңірге белгілі қоғам қайраткерлерінің бар екендігін айта кеткен жөн. Олар әйелдерге өз бизнесін ашуға көмектесіп қана қоймай, сондай-ақ басқа да қоғамдық маңызға ие жұмыстарды атқарады.

Кездесу барысында әйелдерді жинақтаушы зейнетақы жүйесіне тарту мәселесі талқыланды. Қазақстан Республикасының Статистика жөніндегі комитетінің деректеріне сәйкес 2017 жылғы 1 шілдедегі жағдай бойынша әйелдер арасында жұмыспен қамтылғандардың саны шамамен 4,1 млн. адамды құраған.

Ал Бірыңғай жинақтаушы зейнетақы қорында ағымдағы жылдың басындағы жағдай бойынша міндетті зейнетақы жарналарын есепке алу үшін әйелдердің атына ашылған жеке зейнетақы шоттарының (ЖЗШ) саны 4,2 миллионнан асты. Олардың ішінде зейнетақы төлемдерін алушылардың шоттары мен шетелге тұрақты тұруға кеткендердің жабылмаған шоттары да бар. Басқаша айтқанда жұмысбасты әйелдерді жинақтаушы зейнетақы жүйесімен қамтуда оң нәтижелер байқалады: егер 2014-2015 жылдары ЖЗШ саны жұмыспен қамтылған тұрғындардың санынан аз болса, 2017 жылы жағдай керісінше жақсарған.

Зейнетақы Қорының деректеріне сәйкес Шығыс Қазақстан облысы әйелдерінің міндетті зейнетақы жарналары бойынша ашылған шоттарының саны 346 мың бірлікті (немесе облыс бойынша 46%), ал оларда жинақталған зейнетақы жинақтарының сомасы 202 млрд теңгені құрайды. Бұл облыс бойынша зейнетақы жинақтарының жалпы көлемінің 40 пайызына жетеді. Жалпы, Шығыс Қазақстан облысы тұрғындарының жинақтары орташа есеппен 641 мың теңгені құрайды. Шығыс Қазақстан облысы бойынша әйелдердің зейнетақы жинақтарының орташа сомасы 584 мың теңгені құрайды. Бұл облыс бойынша ер азаматтардың жинақтарынан 23 пайызға төмен.

Сонымен қатар Нұрбүбі Серікқажықызы кездесуге қатысушыларға жинақтаушы зейнетақы жүйесі, Қордың қызметі мен жаңа сервистері туралы жан-жақты әңгімелеп, олардың сұрақтарына жауап берді.