Жаңалықтар

2018 жылдың 1 сәуіріне қарай Бірыңғай жинақтаушы зейнетақы қорының ҚР Ұлттық Банкінің сенімгерлік басқаруындағы зейнетақы активтері 7,97 трлн теңгені құрады.

2018 жылдың алғашқы үш айы ішінде салымшылар мен алушылардың зейнетақы шоттарына үлестірілген таза инвестициялық табыс 66 млрд теңгеге жетті. Бұл ретте Қордың зейнетақы активтерінің табыстылығы 2017 жылдың наурызы мен 2018 жылдың наурызы аралығында 8,00 пайызды құрады. Ал бұл кезеңде инфляция деңгейі 6,6 пайыз болды. Яғни, табыстылық инфляция деңгейінен жоғары деген сөз.

Еске сала кетелік, зейнетақы активтері бойынша инвестициялық табыстың көлемі қаржы нарығындағы ахуалға және зейнетақы активтері есебінен сатып алынған қаржы құралдарының бағасына тәуелді. ҚР Ұлттық Банкі ұзақ мерзімді келешекте табыстылықтың тұрақты деңгейін қамтамасыз ету мақсатында өзінің инвестициялық стратегиясында әртараптандырылған инвестициялық портфель тұжырымдамасын ұстанады.

Қазіргі уақытта портфельдің негізгі бөлігі «Қазақстан Республикасының мемлекеттік құнды қағаздарына» тиесілі. 2018 жылғы 1 сәуірдегі жағдай бойынша олардың пайыздық үлесі – 44,89% болды. Есепті айда мемлекеттік құнды қағаздардың ағымдағы құны 112,03 млрд теңгеге артып, 3 580,47 млрд теңгені құрады. Екінші орында «Қазақстан Республикасының екінші деңгейдегі банктерінің облигациялары». Олардың портфельдегі үлесі – 15,41%. Ал ағымдағы құны – 1 229,20 млрд теңге. Үшінші орында «Шет мемлекеттердің мемлекеттік құнды қағаздары» деп аталатын қаржы құралдары. Олардың портфельдегі үлесі – 13,86% болса, ағымдағы құны 19,15 млрд теңгеге артып, 1 105, 56 млрд теңгені құрады.

БЖЗҚ зейнетақы активтері есебінен сатып алынған осы және өзге де қаржы құралдары теңгеде (69,42%), АҚШ долларында (30,03%) және Ресей рублінде (0,45%) номинирленген. Инвестициялық портфельдің толық құрылымы БЖЗҚ ресми сайтында қолжетімді

2018 жылдың 1 сәуіріне қарай зейнетақы активтерінің 73,29 пайыздан астамы рейтингі «ААА» -дан «BBB-»-ға дейінгі тәуекелі ең төмен қаржы құралдарына, ал 15,58 пайызы ұстамды дәрежедегі тәуекелі бар (рейтингі «ВВ+» -тен «В-») қаржы құралдарына орналастырылды.