2018 жылғы 1 қаңтардағы жағдай бойынша зейнетақы жинақтарының жалпы сомасы 7,78 трлн теңгені құрады. Сөйтіп 2017 жылдың басынан бері 1,1 трлн теңгеге артты. Яғни, бір жыл ішіндегі өсім 16,4 пайызды құрады.
2018 жылдың 1 қаңтарына қарай шарттардың барлық түрлері бойынша салымшылардың (алушылардың) жеке зейнетақы шоттарының (ЖЗШ) саны 10,12 млн бірлік, оның ішінде міндетті зейнетақы жарналары (МЗЖ) есебінен 9,64 млн бірлік болды. Міндетті кәсіптік зейнетақы жарналарын (МКЗЖ) есепке алу бойынша салымшылардың (алушылардың) ЖЗШ саны 443 мың бірлікті, ал ерікті зейнетақы жарналарын есепке алу (ЕЗЖ) бойынша - 39 мың бірлікті құрады.
2017 жылы зейнетақы жарналары бойынша түсімдердің жалпы сомасы 756,5 млрд теңге болды. Зейнетақы жарналарының жалпы түсімі бір жыл ішінде 8,3 пайызға өсті. 2016 жылдың қорытындысы бойынша бұл көрсеткіш 698,42 млрд теңгені құраған болатын. Міндетті зейнетақы жарналары бойынша жарналардың орташа мөлшері 15 078 теңгені құрады.
2017 жылы БЖЗҚ салымшылары мен алушыларының жеке зейнетақы шоттарына есептелген таза инвестициялық табыс сомасы 550,6 млрд теңге болды. Қордың зейнетақы активтерінің табыстылығы 7,92 пайызды құрады. Бұл кезеңде инфляция деңгейі 7,1 пайыз болғанын еске саламыз.
2017 жылдың қаңтар – желтоқсан айлары аралығында БЖЗҚ-дан төленген зейнетақы төлемдерінің сомасы 211,12 млрд теңге, оның ішінде сақтандыру ұйымдарына жасалған аударымдар 26,06 млрд теңге болды. Салыстырып қарайтын болсақ, өткен жылдың сәйкес кезеңінде Қордан 169,69 млрд теңге төленсе, оның ішінде сақтандыру ұйымдарына жасалған аударымдар 22,69 млрд теңгені құраған. 2017 жылы орта есеппен 1 адамға берілген зейнетақы төлемдерінің сомасы шамамен 576,5 мың теңгеге жетті.
Бүгінде салымшы (алушы) жеке зейнетақы шотындағы зейнетақы жинақтарының жай-күйі туралы ақпаратты (оның ішінде есептелген инвестициялық табысты) Қор кеңсесінде, сондай-ақ дәстүрлі пошта байланысы, электрондық пошта, Қор сайты немесе ұялы қосымша арқылы алуға болады.
Сонымен қатар 2017 жылы интернет байланысы тәсілін таңдағандар саны 2016 жылмен салыстырғанда 33 пайызға артып, 2018 жылдың 1 қаңтарына қарай 3,9 млн адамды құрады. Ал үзінді-көшірмені электрондық пошта арқылы алуды таңдағандар саны 2018 жылдың 1 қаңтарына қарай 0,8 млн адамға жетті. Бұл өткен жылдың сәйкес кезеңімен салыстырғанда 75 пайызға жоғары.
Ағымдағы жылдың басына қарай шамамен 4,7 млн адам зейнетақы шотының жай-күйі туралы ақпарат алу тәсілі ретінде хабарлаудың электрондық тәсілін таңдаған. Нақты айтар болсақ, шамамен 0,8 млн адам үзінді-көшірмені электрондық мекенжайға алатын болса, 3,9 млн адам ақпаратты Қор сайты немесе әр түрлі операциялық жүйелерде жұмыс істейтін смартфондар мен планшеттерге арналған «ENPF» ұялы қосымшасы арқылы алу мүмкіндігіне ие. 2017 жылы олардың қатарына хабарлау тәсілін өзгерту туралы қосымша келісім жасау арқылы 1,3 млн салымшы (алушы) келіп қосылды.
Бір жыл ішінде ұялы қосымшаны жүктеп алу саны 2,4 есеге артып, 1,2 млн бірлікті құрады. Еске сала кетелік, 2017 жылдың 1 қаңтарына қарай бұл көрсеткіш 509,7 мың жүктеп алуды құраған болатын.
БЖЗҚ әрбір салымшының қамын ойлай отырып, зейнетақы қызметтерін қашықтықтан көрсету және ақыл-кеңес беру арналарын тұрақты дамытуға күш салады. Еске сала кетелік, Қор 2017 жылы салымшылар мен алушыларға Қор кеңселеріне келмей-ақ негізгі қызметтерді пайдалануға мүмкіндік беретін электрондық сервистерді енгізді.
Содан бері 2018 жылдың 1 қаңтарына қарай салымшылар мен алушылар Қор сайтындағы барлық электрондық сервистерді пайдаланған.
Нақты айтар болсақ, 250 салымшы онлайн тәртібінде жеке зейнетақы шотын ашса, шамамен 50 алушы зейнетақы төлемдерін тағайындау жөнінде өтініш берген. Сондай-ақ шамамен 1,2 мың адам жеке деректемелеріне өзгерістер енгізсе, шамамен 500 салымшы зейнетақы шоты бойынша ақпарат алу тәсілін интернет байланысы арқылы алуға ауыстырған.
БЖЗҚ филиалдық желісінің қызметкерлері 2017 жылы кәсіпорындар мен ұйымдарда 18 мыңнан астам көшпелі таныстырылымдық шаралар өткізді. Оларға 556 мыңнан астам адам қатысты. Салымшылар мен алушыларға қызмет көрсету бойынша 6,3 миллионға жуық операция жүзеге асырылған.
Сондай-ақ 2017 жылы қашықтықтан байланыс жасау арналары - байланыс орталығы, Қор сайтындағы «Кері байланыс» және «Онлайн чат» нысаны арқылы, қағаз жүзінде, «Пікірлер мен ұсыныстар кітабы» және әлеуметтік желілер арқылы азаматтардан Қорға 405 мыңнан астам өтініш келіп түскен. Оларға 1-3 күн ішінде жауаптар қайтарылды. Салыстырып қарайтын болсақ, 2016 жылы шамамен 169 мың өтініш келіп түскен болатын. 2017 жылдың наурыз айынан бастап Қордың сайтында «Басқарма Төрайымының блогы» жұмыс істей бастады. Содан бері 2018 жылдың 1 қаңтарына қарай «Басқарма Төрайымының блогына» 393 өтініш келіп түсті. Оларға дер кезінде жауап қайтарылды.
5569